Asiagn Gamesમાં ચીનને ધૂળ ચટાડી ભારતની પરવીન હુડાએ જીત્યો ગોલ્ડ, બોક્સિંગ ફાઈનલમાં રોમાંચક મુકાબલો

એશિયન ગેમ્સનો 13મા દિવસ ભારત માટે મેડલનો વરસાદ થઈ રહ્યો છે. ગોલ્ડ, સિલ્વર અને બ્રોન્ઝ મેડલ મેળવી એશિયન ગેમ્સમાં ભારતીય ખેલાડીઓ શાનદાર પ્રદર્શન કરી રહ્યા છે. આજના દિવસની શરૂઆતમાં મહિલા રિકર્વ ટીમ ઇવેન્ટની ફાઇનલમાં ભારતે ગોલ્ડ જીત્યો. જયારે હાલમાં ફરી ભારતના ખાતામાં વધુ એક ગોલ્ડની સિદ્ધિ પ્રાપ્ત થઈ છે. વુમન બોક્સિંગ 65 કિગ્રા.માં પરવીન હુડાએ ચીનની ખેલાડીને જોરદાર ટક્કર આપી ગોલ્ડ પોતાના નામે પાક્કો કર્યો છે. આ ગોલ્ડ મેડલ સાથે, ભારત હવે મેડલ ટેલીમાં છઠ્ઠા ક્રમે છે. તેના ખાતામાં કુલ 13 ગોલ્ડ મેડલ સહિત 73 છે. બોક્સિંગમાં પણ ત્રણ કાંસ્ય ચંદ્રકો સહિત પાંચ ચંદ્રકો છે.

પરવીન હુડ્ડાનો એશિયન ગેમ્સમાં તોફાન

ભારતની સ્ટાર બોક્સર પરવીન હુડ્ડાએ શાનદાર વાપસી કરતા મહિલાઓના 65 કિગ્રા વજન વર્ગની ફાઇનલમાં ગોલ્ડ મેડલ પોતાના નામે કર્યો છે. અત્યંત રોમાંચક મુકાબલામાં પરવીને ચાઇનીઝ તાઇપેઈની ચેન નિએન-ચીનને 3-2ના વિભાજિત નિર્ણય (Split Decision)થી હરાવીને દેશને સુવર્ણચંદ્રક અપાવ્યો હતો. ડોપિંગ ઉલ્લંઘનના કારણે હાંગઝોઉ એશિયન ગેમ્સનો બ્રોન્ઝ મેડલ ગુમાવ્યા બાદ, રિંગમાં પાછા ફરીને ગોલ્ડ મેડલ જીતવાની પરવીનની આ સિદ્ધિ ખૂબ જ પ્રેરણાદાયી છે.

પહેલો રાઉન્ડથી પરવીનનો દબદબો

ફાઇનલ મેચની શરૂઆતમાં જ પરવીન હુડ્ડાએ પોતાની ઉત્કૃષ્ટ રણનીતિનો પરિચય આપ્યો હતો. તેણે પોતાની લાંબી પહોંચનો ફાયદો ઉઠાવીને યોગ્ય અંતર જાળવી રાખ્યું અને વળતા પ્રહાર (Counterpunches) દ્વારા સતત પોઈન્ટ મેળવ્યા. પરવીને કેટલાક અકસીર બોડી શોટ્સ પણ લગાવ્યા હતા. પ્રથમ રાઉન્ડમાં પાંચેય જજોએ પરવીનના પક્ષમાં 10-9નો સ્કોર આપીને રાઉન્ડ ૫-૦થી તેના નામે કર્યો હતો.

બીજો રાઉન્ડમાં ચાઇનીઝ તાઇપેઈની વાપસી

બીજા રાઉન્ડમાં ચેન નિએન-ચીને જોરદાર વાપસી કરી હતી. પરવીને અંતર જાળવી રાખીને લેન્ડ જેબ્સ અને બોડી શોટ્સ મારવાના પ્રયાસો ચાલુ રાખ્યા હતા, પરંતુ રાઉન્ડના અંત સુધીમાં ચેને તીક્ષ્ણ '1-2 મુક્કાઓ' (1-2 punches) મારીને મહત્વના પોઈન્ટ્સ મેળવ્યા હતા. પાંચેય જજોએ આ રાઉન્ડ ચેનને 10-9થી આપ્યો, જેના કારણે મેચ 1-1ની બરાબરી પર આવી ગઈ હતી.

અંતિમ રાઉન્ડ અને પરવીનની રોમાંચક જીત

નિર્ણાયક અંતિમ રાઉન્ડમાં બંને બોક્સરો વચ્ચે કાંટાની ટક્કર જોવા મળી હતી. પરવીને શાંતિ જાળવી રાખીને શ્રેષ્ઠ વળતા મુક્કાઓથી સ્કોરબોર્ડ પર પોતાની લીડ જાળવી રાખી હતી. કેન્સર જેવી ગંભીર બીમારીને માત આપીને રિંગમાં વાપસી કરનારી ભૂતપૂર્વ વર્લ્ડ ચેમ્પિયન ચેને પણ આકરી ફાઈટ આપી હતી. અંતે પરવીને ૩-૨થી વિજય મેળવ્યો હતો. મેચ પૂરી થયા બાદ ચેને ખેલદિલી દર્શાવતા પરવીનને ઉંચકીને તેની સુવર્ણ જીત બદલ વધાવી લીધી હતી.

આ પણ વાંચો : Asian Games 2026 : ભારતીય પુરુષ રિકર્વ તીરંદાજી ટીમે જીત્યો સિલ્વર મેડલ, યશદીપ, ધીરજ અને નીરજનો ધમાકો